SK Chairperson Gab Lopez, Kinilala sa Cyber Youth Leadership Course

Ginawaran ng Gold Medal si SK Chairperson Gabriel Matthew “Gab” Lopez ng Barangay Kanluran Kabubuhayan, Nagcarlan, Laguna matapos siyang kilalanin bilang isa sa Most Outstanding Students sa Cyber Youth Leadership Course: Digital Bayanihan (Batch 1).

Ang nasabing programa ay pinangunahan ng National Cyber Training Institute sa pakikipagtulungan ng National Youth Commission, at nagtapos sa isang closing ceremony na ginanap sa Heroes Hall, Philippine Public Safety College, Quezon City.

Layunin ng Cyber Youth Leadership Course na linangin ang kakayahan ng mga kabataan sa larangan ng cyber awareness, digital responsibility, at information integrity, upang maging aktibong katuwang sa pagtataguyod ng ligtas at responsableng digital na komunidad. Bahagi rin ng programa ang pagbuo at presentasyon ng mga kalahok ng kani-kanilang cyber awareness campaign materials, kabilang ang infographics at audio-visual presentations na nakaangkla sa temang Digital Bayanihan.

Sa ginanap na seremonya, itinampok ang iba’t ibang bahagi ng programa tulad ng presentasyon ng mga kandidato para sa pagtatapos, deklarasyon ng mga nagsipagtapos, at paggawad ng mga parangal. Naging tampok din ang keynote address ni PLTGEN Ricardo F. De Leon (Ret.), Director General ng National Intelligence Coordinating Agency (NICA), bilang panauhing pandangal.

Bilang isa sa mga natatanging kalahok, kinilala si Lopez sa kanyang ipinakitang kahusayan sa pamumuno, inobasyon, at dedikasyon sa digital advocacy. Sa kanyang kasalukuyang tungkulin bilang SK Chairperson, aktibo siyang nagsusulong ng mga programa para sa karapatan sa impormasyon, youth empowerment, at community development.

Ang pagkilalang ito ay sumasalamin sa patuloy na pag-angat ng mga kabataang lider mula sa lokal na pamahalaan tungo sa pambansang antas, at nagpapatibay sa mahalagang papel ng kabataan sa pagtataguyod ng Digital Bayanihan sa bansa.